Agjencia për Informim dhe Privatësi thellon bashkëpunimin me partnerë të institucioneve evropiane për avancimin e transformimit digjital në Kosovë

Komisionerja për Informim dhe Privatësi, znj. Krenare Sogojeva-Dërmaku, mirëpriti në një vizitë zyrtare Komisionerin Kroat për Mbrojtjen e të Dhënave Personale, njëherit Zëvendëskryesuesin e Bordit Evropian për Mbrojtjen e të Dhënave (EDPB), z. Zdravko Vukić, si dhe z. Giovanni Maria Riccio, Profesor i të Drejtës së Privatësisë dhe Teknologjisë në Universitetin e Salernos, Itali .

Në kuadër të kësaj vizite, Komisionerja Sogojeva-Dërmaku mbajti fjalën hyrëse në konferencën “Navigating the Digital Transformation of the Financial Sector – Opportunities and Challenges in the Age of AI”, të organizuar nga ProCredit Bank, me c’rast ajo prezantoi veprimet e Agjencisë drejt rregullimit të IA, ndërsa theksoi rëndësinë e balancimit mes inovacionit teknologjik dhe mbrojtjes së të drejtave themelore të qytetarëve.

Gjatë konferencës, Komisioneri Vukić zhvilloi një bashkëbisedim me znj. Kaltrina Haxha Ferizi, COO në ProCredit Bank Kosovë, ku vlerësoi lart punën e Agjencisë dhe progresin institucional të Kosovës drejt përputhjes me kornizën evropiane për mbrojtjen e të dhënave, duke ritheksuar mbështetjen e vazhdueshme për bashkëpunim të ndërsjellë.

Ndërkohë, Prof. Giovanni Maria Riccio mori pjesë në një panel tematik mbi sfidat dhe mundësitë e transformimit digjital në sektorin financiar. Si ekspert ndërkombëtar për të drejtën e privatësisë dhe teknologjisë, ai ndau perspektivën akademike mbi ndikimin e Inteligjencës Artificiale në të drejtat themelore të individit në një epokë të automatizuar të proceseve financiare.

Në vazhdën e aktiviteteve, Komisionerja Sogojeva-Dërmaku dhe Komisioneri Vukić realizuan një vizitë në Fakultetin Juridik të Universitetit të Prishtinës, ku u pritën nga Dekani, z. Avni Puka dhe përfaqësues të stafit akademik. Gjatë takimit u theksua rëndësia e forcimit të bashkëpunimit akademik ndërmjet Kosovës dhe Kroacisë, me qëllim të ndërgjegjësimit të qëndrueshëm të studentëve për mbrojtjen e të dhënave personale.

Kjo vizitë e mbështetësve dhe ekspertëve ndërkombëtarë përforcoi partneritetin ndërmjet Agjencisë dhe institucioneve evropiane në drejtim të avancimit të transformimit digjital dhe ndërtimit të një sistemi të qëndrueshëm dhe të drejtë, mbi bazat e privatësisë dhe mbrojtjes së të dhënave personale.