Gjyqtarët dhe prokurorët e sapoemëruar vizitojnë Agjencinë për Informim dhe Privatësi

Në kuadër të programit fillestar për gjyqtarë dhe prokurorë të rinj, Agjencia për Informim dhe Privatësi priti sot për vizitë pjesëtarët e Gjeneratës XII, në bashkëpunim me Akademinë e Drejtësisë.

Komisionerja, znj. Krenare Sogojeva Dërmaku, prezantoi funksionet kryesore të Agjencisë, me theks të veçantë në mbrojtjen e të dhënave personale dhe garantimin e qasjes në dokumente publike, në kontekstin e procedurave gjyqësore.

Përmes shembujve konkretë nga praktika, pjesëmarrësit u njohën me parimet themelore të mbrojtjes së të dhënave, përkatësisht në rëndësinë e trajtimit të kujdesshëm të provave dhe të dhënave personale gjatë fazave të hetimit dhe shqyrtimit gjyqësor.

Në fund të takimit, Komisionerja Sogojeva Dërmaku rikonfirmoi gatishmërinë e Agjencisë për të ofruar mbështetje profesionale dhe këshilla në zbatimin e drejtë të ligjit, përmes një bashkëpunimi të qëndrueshëm dhe të frytshëm me sistemin e drejtësisë.